Aktuale

Në versionin publik të vendimit të dorëzuar më 24 shtator 2024, gjykatësja e vetme në çështjen Isni Kilaj hodhi poshtë kërkesën e Mbrojtjes për ndryshimin e kushteve të lirimit të Isni Kilajt, të cilat ishin përcaktuar në maj të këtij viti. Mbrojtja kërkoi ndryshimin e përkohshëm të kushteve aktuale për ta lejuar atë të udhëtojë në Shqipëri, mirëpo gjykatësja Marjorie Masselot (Marzhori Masëlo) përcaktoi se ndryshimet e propozuara nuk do të trajtonin mjaftueshëm rreziqet ekzistuese të përshkruara në nenin 41(6)(b) të Ligjit.

Versioni i redaktuar publik i aktgjykimit kundër Pjetër Shalës, i shpallur më 16 korrik 2024, është i disponueshëm në dokumentet publike të gjykatës, në anglisht, si dhe në faqen e çështjes.

Dëshmitari i ri i mbrojtur i ZPS-së W04422 ka nisur dëshminë këtë mëngjes përmes video-lidhjes. Dëshmia e këtij dëshmitarit do të zhvillohet në seancë të mbyllur.

Trupi Gjykues në çështjen Januzi, Bahtijari dhe Haxhi Shala ka caktuar Konferencën përgatitore për gjykimin më 7,8 dhe 9 tetor 2024, nga ora 09:30 deri në orën 17:30. Gjithashtu, janë rezervuar edhe datat 10 dhe 11 tetor, me seancat e planifikuara nga ora 09:30 deri në orën 16:00, nëse është e nevojshme. Vendimi i Trupit Gjykues, i cili përfshin detaje të tjera si parashtresat e palëve në lidhje me hetimet e tyre, nxjerrjen e materialeve, datën e propozuar për fillimin e gjykimit më 11 nëntor dhe dëshmitë e dëshmitarëve, ndodhet këtu.

Ju njoftojmë për çështjen më të fundit në Gjykatën Kushtetuese e cila ka të bëjë me çështjen Salih Mustafa. Më 23 shtator 2024, Kryetarja Trendafilova caktoi Panelin e Gjykatës Kushtetuese për të vendosur mbi kërkesën e përbashkët të avokatit të viktimave dhe të ZPS-së lidhur me zgjatjen e afatit për dorëzimin e referimeve të tyre, sipas nenit 49 të Ligjit. Kjo kërkesë vjen pas vendimit të Gjykatës Supreme më 29 korrik dhe dënimit të ri për Mustafën nga Paneli i Gjykatës së Apelit më 10 shtator. Lidhur me këtë kërkesë dhe çdo çështje përkatëse do të vendosin gjykatësit Vidar Stensland, Rumen Nenkov dhe Romina Inkuti.

Pas përfundimit të dëshmisë së dëshmitarit Demush Krasniqi, gjykimi në çështjen Thaçi dhe të tjerët përfundoi për ditën e sotme. Seanca e planifikuar për nesër, 24 shtator, është anuluar, ndërsa procesi gjyqësor do të vazhdojë të mërkurën, 25 shtator, në orën 09:00.

Demush Krasniqi është dëshmitari i ri i ZPS-së, dëshmia e të cilit filloi këtë mëngjes. Sipas ZPS-së, Krasniqi iu bashkua UÇK-së rreth majit të vitit 1998 dhe më vonë shërbeu si pjesëtar i policisë ushtarake në Brigadën 122. Ai është dëshmitari i 89-të i ZPS-së në gjykatë deri më tani. Siç njoftoi Trupi Gjykuessot në mëngjes, seanca e caktuar për të enjten (26 shtator) do të përfundojë në ora 15:00.

Për informacion të përditësuar mbi orarin e seancave të DHSK-së, ju lutemi referojuni kalendarit tonë në internet.  

Ju lutemi vini re se transmetimi i Konferencës para apelit në çështjen Pjetër Shala, e cila do të mbahet sot në ora 10:00, do të bëhet me një vonesë prej 45 minutash. Klikoni këtu për të përcjellur transmetimin në shqip.

Më 19 shtator 2024, Kryetarja e DHSK-së Trendafilova caktoi Panelin e Gjykatës Supreme për të vendosur mbi kërkesën e Haxhi Shalës për rishqyrtimin e vendimit të mëparshëm të Gjykatës Supreme më 9 shtator 2024. Me vendimin e mëparshëm ishte hedhur poshtë kërkesa e të akuzuarit për mbrojtjen e ligjshmërisë lidhur me mbajtjen e tij në paraburgim. Paneli i njëjtë, i përbërë nga gjykatësit Ekaterina Trendafilova (kryesuese), Kristinë van den Vijngart dhe Daniel Fransen, do të vendosë lidhur me kërkesën më të fundit. Vendimi i caktimit mund të shihet këtu.

Pas përfundimit të dëshmisë së dëshmitarit W04366, gjykimi në çështjen Thaçi dhe të tjerët përfundoi për ditën e sotme dhe për këtë javë. Procesi gjyqësor do të vazhdojë të hënën, 23 shtator, në orën 09:00.