Aktuale

Në vendimin e tij të datës 11 korrik, Trupi Gjykues në çështjen Thaҫi dhe të tjerët informoi palët se më 16 korrik, në orën 09:00, do të lëshojë gojarisht vendimin e tij mbi mocionet e Mbrojtjes për rrëzimin e akuzave, në bazë të rregullës 130 të Rregullores. Po kështu, Trupi Gjykues theksoi se Mbrojtësi i Viktimave duhet të jetë gati të fillojë çështjen e tij në të njëjtën ditë. 

Transkripti i informimit të sotëm javor të DHSK-së për median ndodhet këtu.

Informimi javor i radhës për median do të mbahet të enjten, më 10 korrik, në orën 14:30. Gjatë këtij informimi, zëdhënësit e DHSK-së do të japin një informacion të përditësuar mbi zhvillimet e fundit lidhur me procedurat gjyqësore dhe veprimtaritë e tjera publike të gjykatës. Gazetarët do të kenë mundësinë të bëjnë pyetje. Për të marrë pjesë, për çdo informim javor nevojitet regjistrimi paraprak. Ju lutemi dërgoni një mesazh elektronik me emrin dhe mbiemrin tuaj si dhe emërtimin e medias në [email protected]. Afati i fundit për regjistrimin paraprak është çdo të enjte deri në ora 12:00. Detajet e platformës Zoom do të ju dërgohen pas regjistrimit paraprak. Regjistrimet e informacioneve të ofruara gjatë informimeve javore do të vihen në dispozicion në kanalin Youtube të DHSK-së.

Më 9 korrik 2025, Dhoma e Specializuar e Gjykatës Kushtetuese (DHSGJK) hodhi poshtë referimin e Salih Mustafës, i cili pretendonte se dënimi i tij me 15 vjet burg për krimin e luftës të vrasjes së paligjshme shkel nenin 33(3) të Kushtetutës së Kosovës dhe se ishte joproporcional në raport me veprën penale. Dhoma e Specializuar konstatoi se kërkesa është e papranueshme, në përputhje me rregullën 14(f) të Rregullores së Punës të DHSGJK-së, duke konstatuar se Mustafa nuk ka arritur të provojë se dënimi i shqiptuar përbënte shkelje të të drejtave themelore sipas Kushtetutës. 

Ky ishte referimi i dytë i Mustafës në Dhomën e Specializuar të Gjykatës Kushtetuese, të cilët pretendonin, ndër të tjera, shkelje të të drejtave të tij themelore në lidhje me vendimet mbi dënimin. Të gjitha dosjet përkatëse janë në dokumentacionin gjyqësor publik me numrat e çështjeve KSC-CC-2024-27 dhe KSC-CC-2025-29.

Më 3 korrik, Trupi Gjykues në çështjen kundër Thaçit, Veselit, Selimit dhe Krasniqit miratoi kërkesën e Mbrojtësit të Viktimave që, varësisht nga vendimi i Trupit Gjykues mbi mocionin sipas Rregullës 130, dy dëshmitarë ekspertë të dëshmojnë së bashku më 16 korrik. Trupi Gjykues gjithashtu e shtyu vendimin e tij mbi disa raporte të ekspertëve, të propozuara nga Mbrojtësi i Viktimave, ndërsa hodhi poshtë të tjerat. Hollësi të mëtejshme mund të gjenden në vendimin e Trupit Gjykues.

Në një parashtrim më 4 korrik, Mbrojtësi i Viktimave njoftoi Trupin Gjykues se çështja e tij në gjykatë do të përfshijë vetëm këta dy dëshmitarë ekspertë, dëshmia e përbashkët e të cilëve planifikohet të zgjasë 9 orë, duke përfshirë edhe marrjen në pyetje nga palët e tjera.

Transkripti i informimit të sotëm javor të DHSK-së për median ndodhet këtu.

Pas vendimit më të fundit mbi caktimin e orarit, të lëshuar sot nga Trupi Gjykues, orari i gjykatës në gjykimin Thaçi dhe të tjerët, që mbulon periudhën nga korriku deri në shtator 2025, është i disponueshëm në kalendarin tonë në internet. Ju lutemi vini re se, përveç konferencës për ecurinë e çështjes, e cila është planifikuar për 22 korrik, të gjitha seancat  tjera duhet të konsiderohen si paraprake, në pritje të vendimit të Trupit Gjykues mbi mocionin në bazë të rregullës 130 dhe njoftimeve nga ekipet e Mbrojtjes se a synojnë të dorëzojnë provat e tyre.

Më 2 korrik 2025, Trupi Gjykues II miratoi pjesërisht kërkesën e përbashkët të Mbrojtjes për të ndryshuar orarin e rishikuar të gjykimit të vendosur më 5 qershor. Trupi Gjykues miratoi një shtyrje të shkurtër të Konferencës Përgatitore të Mbrojtjes për datën 19 gusht 2025, por hodhi poshtë kërkesën për të zgjatur afatin për dorëzimin e listave të dëshmitarëve dhe të provave të Mbrojtjes. Trupi Gjykues theksoi se  Mbrojtja duhet të njoftojë Trupin Gjykues deri më 16 korrik 2025 nëse synon të dorëzojë provat e veta dhe informoi palët se çështja e parë e Mbrojtjes duhet të jetë gati të fillojë një javë pas Konferencës Përgatitore të Mbrojtjes.

Trupi Gjykues gjithashtu caktoi konferencën për ecurinë e çështjes, të martën më 22 korrik 2025, në orën 14:00.

Më 30 qershor 2025, Gjykatësja e Procedurës Paraprake, Marzhori Masëlo, hodhi poshtë mocionet e Mbrojtjes së Hashim Thaçit dhe të akuzuarëve të tjerë, që kërkonin shtyrjen e procesit gjyqësor kundër Thaçit në këtë çështje dhe veçimin e aktakuzës ndaj tij. Gjykatësja Masëlo i refuzoi ose i konstatoi të pathemelta të gjitha argumentet e Mbrojtjes lidhur me zhvillimin e procedurave paralele në këtë çështje dhe në çështjen tjetër kundër Thacit para Trupit Gjykues II (KSC-BC-2020-06).

Më shumë hollësi në vendimin e Gjykatëses së Procedurës Paraprake.

Sot më 27 qershor 2025, Paneli i Gjykatës së Apelit ndryshoi datën për shqiptimin e aktgjykimit të apelit në çështjen gjyqësore të Pjetër Shalës, që tani do të shqiptohet më 14 korrik në orën 11:30. Në vendim thuhet se për shkak të rrethanave të paparashikuara, shqiptimi i aktgjykimit nuk mund të mbahet më 15 korrik siç ishte urdhëruar më parë.