Aktuale

Ju lutemi vini re se, siç shihet në kalendarin e gjykatës, seancat gjyqësore në çështjen Shala, të planifikuara më 19 dhe 22 janar, janë anuluar. 

Gjykimi në çështjen Thaçi, Veseli, Selimi dhe Krasniqi ka rinisur me dëshminë e një dëshmitari të ri të ZPS-së, W01493, i cili është dëshmitar i mbrojtur dhe po dëshmon përmes video-lidhjes. Sipas përmbledhjes së lexuar nga ZPS-ja në gjykatë, gjatë periudhës përkatëse ky dëshmitar ka shërbyer në zonën Operative të Dukagjinit dhe dëshmia e tij do të ofroj informacion për strukturën dhe marrëdhëniet ndërmjet UÇK-së dhe Forcave të Armatosura të Republikës së Kosovës (FARK).

Sipas urdhrit gojor të Gjykatësit të Procedurës Paraprake, Giju, të datës 14 dhjetor 2023, ZPS-ja dorëzoi sot aktakuzën e përbashkët për çështjet gjyqësore të Januzit dhe Bahtijarit dhe të Haxhi Shalës. Aktakuza e përbashkët është konfidenciale ndërsa dosja me informacionet mbi parashtrimin ndodhet këtu.

Gjykatësi i Procedurës Paraprake do të vendosë në kohën e duhur lidhur me kërkesën e ZPS-së për bashkimin e këtyre dy çështjeve gjyqësore.

Më 11 janar, Paneli i Gjykatës Kushtetuese i ngarkuar me referimin e Haradinajt, i dorëzuar në nëntor të vitit të kaluar, vendosi të shtyjë vendimin e tij në këtë çështje derisa të pranojë parashtrimet shtesë nga palët, përkatësisht parashtrimin e ZPS-së lidhur me referimin si dhe përgjigjen e saj ndaj kërkesës më të fundit të Haradinajt për pranimin e një prove të re. Gjithashtu, Mbrojtja ftohet që të dorëzojë përgjigjen e saj ndaj përgjigjes së ZPS-së, nëse dëshiron ta bëjë këtë. Më shumë detaje, përfshirë afatet aktuale për dorëzimin e këtyre parashtrimeve, mund të gjenden këtu.

Më 11 janar, Paneli i Gjykatës së Apelit e refuzoi apelin e Isni Kilajt kundër vendimit të gjykatësit të vetëm për mbajtjen e tij të mëtejshme në paraburgim. Më shumë hollësi në vendimin (versioni i redaktuar publik) të Panelit të Gjykatës së Apelit.

Transkripti i informimit të sotëm javor të DHSK-së për median ndodhet këtu.

Informimi javor i radhës për median do të mbahet të enjten, më 11 janar në orën 14:30. Gjatë këtij informimi, zëdhënësit e DHSK-së do të japin një informacion të përditësuar mbi zhvillimet e fundit lidhur me procedurat gjyqësore dhe veprimtaritë e tjera publike të gjykatës. Gazetarët do të kenë mundësinë të bëjnë pyetje. Për të marrë pjesë, për çdo informim javor nevojitet regjistrimi paraprak. Ju lutemi dërgoni një mesazh elektronik me emrin dhe mbiemrin tuaj si dhe emërtimin e medias në [email protected]. Afati i fundit për regjistrimin paraprak është çdo të enjte deri në ora 12:00. Detajet e platformës Zoom do të ju dërgohen pas regjistrimit paraprak. Regjistrimet e informacioneve të ofruara gjatë informimeve javore do të vihen në dispozicion në kanalin Youtube të DHSK-së. 

Pas përfundimit të dëshmisë së dëshmitarit të Mbrojtjes, Safet Gashi, gjykimi në çështjen P. Shala përfundoi për ditën e sotme dhe për këtë javë. Seancat e planifikuara për nesër dhe pasnesër (11 dhe 12 janar) janë anuluar. Seancat e ardhshme janë planifikuar më 19 dhe 22 janar, por Trupi Gjykues do të konfirmojë në kohën e duhur nëse ato do të mbahen apo jo.

Gjatë seancës së sotme Trupi Gjykues lëshoi disa urdhra gojorë, përfshirë atë lidhur me kërkesën e Mbrojtjes për të shtuar një dëshmitare eksperte (psikologe) dhe raportin e saj të ekspertizës në listën e dëshmitarëve dhe listën e provave materiale të Mbrojtjes, si dhe për ta thirrur dëshmitaren për të dëshmuar personalisht më 19 janar. Trupi Gjykues e miratoi pjesërisht kërkesën dhe urdhëroi që dëshmitarja dhe raporti (të cilin Trupi Gjykues e konsideroi relevant për përcaktimin e dënimit) t'i shtohen listës së dëshmitarëve dhe listës së provave materiale të Mbrojtjes. Megjithatë, Trupi Gjykues refuzoi pjesën e kërkesës së Mbrojtjes për dëshminë e kësaj dëshmitareje në gjykatë.

Këtë mëngjes, ZPS-ja është duke vazhduar marrjen në pyetje të dëshmitarit të dhjetë të Mbrojtjes, Safet Gashi.

Ju lutemi vini re se pushimi i drekës në çështjen P. Shala do të jetë prej orës 12:30 deri në ora 14:00 (ose 13:15 – 14:45 transmetimi me vonesë në internet), ndërsa seanca do të vazhdojë deri në orën 16:00, si zakonisht.