• E hënë 28 Gusht, 2023 10:30

    Thaçi dhe të tjerët: dëshmitari i 18-të i ZPS-së fillon dëshminë e tij

    Dëshmitari i mbrojtur W03832 ka nisur dëshminë këtë mëngjes në gjykimin ndaj Thaçit, Veselit, Selimit dhe Krasniqit. Dëshmia e këtij dëshmitari pritet të mbahet kryesisht në seancë të mbyllur për publikun.

  • E premte 25 Gusht, 2023 16:15

    Çështja Shala: përfundon seanca e sotme / argumentet e Mbrojtjes fillojnë në javën e 18 shtatorit

    Gjatë ditës së dytë të Konferencës Përgatitore të Mbrojtjes në çështjen Shala sot, Trupi Gjykues I lëshoi një numër udhëzimesh dhe urdhrash gojorë për organizimin e paraqitjes së provave nga Mbrojtja. Më poshtë janë disa prej tyre:

    • Duke iu referuar rregullës 137 (relevanca e provave) si dhe rregullës 143 (4), e cila bën fjalë për efektivitetin dhe humbjen e papërligjur të kohës,  Trupi Gjykues urdhëroi Mbrojtjen që të heqë pesë emra nga lista e saj e dëshmitarëve. Rrjedhimisht, Mbrojtja duhet të paraqesë listën e rishikuar të dëshmitarëve deri më 29 gusht 2023.

    • Trupi Gjykues i caktoi Mbrojtjes 40,5 orë për paraqitjen e argumenteve të veta. ZPS-së i është caktuar kohë e njëjtë si ajo e përdorur nga Mbrojtja. për marrjen në pyetje të secilit dëshmitar të Mbrojtjes, ndërsa Mbrojtësi i Viktimave do të ketë 25% të kohës së përdorur në mënyrë efektive nga Mbrojtja.

    • Paneli njoftoi se paraqitja e argumenteve nga Mbrojtja do të fillojë në javën që fillon më 18 shtator dhe data e saktë do të njoftohet në kohën e duhur.

  • E enjte 24 Gusht, 2023 14:45

    Informimi javor i DHSK-së për median më 24 gusht 2023: transkripti

    Transkripti i informimit të sotëm javor të DHSK-së për median ndodhet këtu.

    Angela Griep, zëdhënëse e DHSK-së

    Arkivi i të gjitha informimeve të mëparshme është i disponueshëm në këtë faqe ndërsa video incizimet mund të gjenden në kanalin tonë në Youtube

  • E enjte 24 Gusht, 2023 10:30

    Çështja Shala: Fillon Konferenca Përgatitore e Mbrojtjes/ Ndryshon orari për nesër

    Gjatës seancës së sotme, qëllimi i së cilës është përgatitja e Mbrojtjes për paraqitjen e argumenteve, palët do të shqyrtojnë pikat e rendit të ditës, të caktuara nga Trupi Gjykues në seancën e fundit më 21 gusht, si hetimet e Mbrojtjes, dëshmitarët që do të thirren nga Mbrojtja, radha e tyre etj. Sa i përket seancës së nesërme, e cila do të fillojë në ora 14:30 (dhe jo në ora 09:30 siç ishte caktuar më parë), Trupi Gjykues ka në plan të lëshojë disa urdhra dhe udhëzime gojore.

  • E mërkurë 23 Gusht, 2023 15:30

    Informimi javor për median më 24 gusht

    Informimi javor i radhës për median do të mbahet të enjten, më 24 gusht, në orën 14:30. Gjatë këtij informimi, zëdhënësit e DHSK-së do të japin një informacion të përditësuar mbi zhvillimet e fundit lidhur me procedurat gjyqësore dhe veprimtaritë e tjera publike të gjykatës. Gazetarët do të kenë mundësinë të bëjnë pyetje. Për të marrë pjesë, për çdo informim javor nevojitet regjistrimi paraprak. Ju lutemi dërgoni një mesazh elektronik me emrin dhe mbiemrin tuaj si dhe emërtimin e medias në [email protected]. Afati i fundit për regjistrimin paraprak është çdo të enjte deri në ora 12:00. Detajet e platformës Zoom do të ju dërgohen pas regjistrimit paraprak. Regjistrimet e informacioneve të ofruara gjatë informimeve javore do të vihen në dispozicion në kanalin Youtube të DHSK-së. 

  • E hënë 21 Gusht, 2023 17:30

    Pushohet hetimi kundër Driton Lajçit

    Më 18 gusht 2023, në bazë të rregullës 47 të Rregullores, ZPS-ja dorëzoi njoftim për pushimin e hetimit kundër Driton Lajçit. Sikurse shihet nga parashtrimet publike në këtë çështje, Driton Lajçi, ish-zyrtar i Ministrisë së Drejtësisë së Kosovës u bë i dyshuar i ZPS-së në vitin 2019. Çështja e tij lidhej me hetime dhe/ose çështje gjyqësore që kishin të bënin me krime bazë të përfshira në juridiksionin e Dhomave të Specializuara. Më poshtë jepet kronologjia e zhvillimeve kryesore në këtë çështje, me lidhjet përkatëse për parashtrimet e protokolluara, si edhe aspektet e shqyrtuara prej Dhomës së Specializuar të Gjykatës Kushtetuese (DHSGJK) dhe Avokatit të Popullit të DHSK-së:

    2019: Driton Lajçi u bë i dyshuar dhe u thirr në atë cilësi për t’u marrë në pyetje nga ZPS-ja.

    Lajçi parashtroi kërkesë referuese në DHSGJK ku paraqiti pretendime për shkelje të të drejtave të tij gjatë procedurës së marrjes në pyetje nga ZPS-ja

    2020:  DHSGJK-ja e deklaroi të papranueshme kërkesën referuese meqenëse kundër tij ende nuk ishte ngritur akuzë penale dhe, rrjedhimisht, kërkesa referuese u konstatua e parakohshme.

    2021: Gjykatësi i Vetëm  hodhi poshtë kërkesën e parë të Lajçit  për një urdhër drejtuar ZPS-së për pushimin e hetimit kundër tij. Më pas, Gjykata e Apelit rrëzoi apelin e Lajçit kundër këtij vendimi dhe u pajtua me konstatimin e Gjykatësit të Vetëm se periudha e hetimit nuk binte në kundërshtim me kriterin e “periudhës së arsyeshme” sipas rregullës 47 të Rregullores;

    Lajçi i parashtroi Avokatit të Popullit të DHSK-së ankesë ku pretendonte, ndër të tjera, se procedurat e ZPS-së dhe trajtimi i tij në përgjithësi kishin cenuar të drejtën themelore të tij për gjykim të drejtë. Avokati i Popullit i DHSK-së konkludoi se nuk kishte kompetencë për të shqyrtuar ankesën dhe e refuzoi atë mbi këtë bazë.

    2022 - 2023: Gjykatësi i Vetëm hodhi poshtë kërkesën e dytë të Lajçit  për urdhër drejtuar ZPS-së për pushimin e hetimit kundër tij. Lajçi parashtroi apel kundër këtij vendimi por Gjykata e Apelit e rrëzoi atë dhe përsëri u pajtua me konstatimin e Gjykatësit të Vetëm se periudha e hetimit nuk binte në kundërshtim me kriterin e “periudhës së arsyeshme” sipas rregullës 47 të Rregullores.

    ZPS-ja parashtron njoftim se hetimi i saj kundër Lajçit ka përfunduar.

  • E hënë 21 Gusht, 2023 16:00

    Gjykimi i Shalës: konferenca përgatitore e Mbrojtjes mbahet më 24 Gusht

    Në vendimin gojor sot, Trupi Gjykues në çështjen Shala vendosi të thërrasë konferencën përgatitore të Mbrojtjes për të enjten, 24 gusht, në ora 99:30. Trupi Gjykues gjithashtu përcaktoi një numër pikash në rendin e ditës të konferencës, në lidhje me të cilat Mbrojtja dhe palët e tjera janë urdhëruar të dorëzojnë parashtrime me shkrim deri më 23 gusht në ora 12:00. Seanca e sotme është mbyllur dhe seancat e caktuara më parë për 22 dhe 23 gusht janë anuluar.

  • E hënë 21 Gusht, 2023 15:00

    Gjykimi i Shalës: orari i modifikuar i gjykatës për sot (2)

    Pas përmbylljes së dëshmisë së dëshmitarëve ekspertë të thirrur nga Mbrojtësi i Viktimave, gjykimi kundër Shalës do të jetë në pushim deri në ora 14:40 (ose deri në ora 15:25 në transmetimin me vonesë).