Çështja gjyqësore Thaçi dhe të tjerët: Trupi Gjykues miraton tërheqjen e Gregori Kihou si mbrojtës i Thaçit
Më 14 shkurt 2024, Trupi Gjykues në çështjen gjyqësore Thaçi dhe të tjerët miratoi tërheqjen e Gregori Kihou si kryembrojtës i Hashim Thaçit. Ky vendim hyn në fuqi kur Administratorja cakton bashkëmbrojtësin e ri. Duke marrë parasysh se Thaçi dhe Lluka Mishetiq (aktualisht njëri nga bashkëmbrojtësit e Thaçit) u pajtuan që Mishetiqi të zëvendësojë Kihoun, Trupi Gjykues ftoi palët dhe Administratoren që të ndërmarrin hapat e nevojshëm për të caktuar Mishetiqin si kryembrojtës të Thaçit sa më shpejtë që të jetë e realizueshme.
Trupi Gjykues miratoi gjithashtu tërheqjen e bashkëmbrojtësit të Thaçit, Xhoe Rider, ndërsa udhëzoi Administratoren që të marrë vendim në lidhje me kërkesën për tërheqjen e tre ndihmësve juridik dhe pesë ndihmësve administrative të ekipit.
Së fundi, Trupi Gjykues shqyrtoi kërkesën e Kihout për pagimin e shpenzimeve nga DHSK-ja gjatë periudhës kalimtare, d.m.th. pas caktimit të mbrojtësit të ri. Trupi Gjykues vuri në dukje se Administratorja mund të vendos të udhëzojë Kihoun që të vazhdojë të veprojë ose të ndihmojë mbrojtësin zëvendësues (për një periudhë prej 45 ditësh), por, duke marrë parasysh se mbrojtësi i ri nuk është caktuar ende dhe Administratorja nuk ka lëshuar këto udhëzime për Kihoun, Trupi Gjykues konstatoi se kërkesa është e parakohshme në këtë fazë dhe rrjedhimisht e hodhi poshtë.
Më shumë hollësi gjeni në vendim.
Informimi javor për median më 15 shkurt
Informimi javor i radhës për median do të mbahet të enjten, më 15 shkurt në orën 14:30. Gjatë këtij informimi, zëdhënësit e DHSK-së do të japin një informacion të përditësuar mbi zhvillimet e fundit lidhur me procedurat gjyqësore dhe veprimtaritë e tjera publike të gjykatës. Gazetarët do të kenë mundësinë të bëjnë pyetje. Për të marrë pjesë, për çdo informim javor nevojitet regjistrimi paraprak. Ju lutemi dërgoni një mesazh elektronik me emrin dhe mbiemrin tuaj si dhe emërtimin e medias në [email protected]. Afati i fundit për regjistrimin paraprak është çdo të enjte deri në ora 12:00. Detajet e platformës Zoom do të ju dërgohen pas regjistrimit paraprak. Regjistrimet e informacioneve të ofruara gjatë informimeve javore do të vihen në dispozicion në kanalin Youtube të DHSK-së.
Gjykimi i P. Shalës: nuk ka seanca nga data 4 deri më 15 mars
Ju informojmë se, siç shihet në kalendarin e gjykatës, seancat gjyqësore në çështjen P. Shala, të planifikuara nga data 4 deri më 15 mars, janë anuluar.
Çështja gjyqësore Januzi, Bahtijari dhe H.Shala: Gjykatësi i Procedurës Paraprake lëshon urdhra gojor në lidhje me financimin e Mbrojtjes
Në fund të konferencës së sotme mbi ecurinë, Gjykatësi i Procedurës Paraprake në çështjen gjyqësore Januzi, Bahtijari dhe H. Shala lëshoi disa urdhra gojor, dy nga të cilët kishin të bënin me financimin e Mbrojtjes.
Pasi dëgjoi palët dhe theksoi urgjencën e aspektit të financimit të ekipeve Mbrojtëse, gjykatësi Giju urdhëroi Zyrën Administrative të DHSK-së të kontaktojë urgjentisht Ministrinë e Drejtësisë së Kosovës, të kërkojë informacion në lidhje me statusin e financimit, mendim për kohën e vendimit të Ministrisë dhe të raportojë deri më 20 shkurt 2024.
Gjithashtu, gjykatësi Giju hodhi poshtë mocionin e Mbrojtjes për pezullim të procesit me konstatimin se vazhdimi i procesit nuk i shkakton dëm Mbrojtjes, duke marrë parasysh se procesi është ende në fazën paraprake dhe aspekti i financimit tashmë është duke u trajtuar për të gjetur zgjidhjen.
Konferenca e ardhshme mbi ecurinë e kësaj çështje gjyqësore do të caktohet në mars.
Januzi & Bahtijari & H. Shala: Konferencë mbi ecurinë e çështjes sot paradite
Ju kujtojmë se sot paradite në orën 10:00 mbahet konferenca mbi ecurinë për çështjen gjyqësore të përbashkët kundër Sabit Januzi, Ismet Bahtijari dhe Haxhi Shala. Sikurse edhe në çështjet gjyqësore të tjera, seanca transmetohet me 45 minuta vonesë. Klilkoni këtu për të ndjekur transmetimin.
Thaçi dhe të tjerët: Vendimi i Trupit Gjykues në lidhje me vizitat private për të akuzuarit
Më 9 shkurt 2024, pasi ka marrë parashtrime nga Adminstratorja dhe palët, Trupi Gjykues në çështjen gjyqësore Thaçi dhe të tjerët konstatoi se në këtë faze të procesit nuk ka asnjë bazë që të vendosen kufizime në lidhje me vizitat private për të akuzuarit, të ngjashme me ato që u caktuan më 1 dhjetor 2023 në lidhje me vizita jo të mbrojtura. Megjithatë, Trupi Gjykues bëri të qartë se çdo keqpërdorim i një privilegji që lidhet me këto vizita do t’I nënshtrohet përgjigjes së duhur.
Trupi Gjykes vuri në dukje se nëse është e nevojshme, Administratorja ka kompetencë të vendosë kufizime konkrete për vizitë personale (në përputhje me, ndër të tjera, nenet 34(12) dhe 41(9) të Ligjit dhe rregullën 27 të Rregullores) dhe rrjedhimisht ka udhëzuar Administratoren ta njoftojë Trupin Gjykues menjëherë në lidhje me ndonjë vendim të tillë, i cili mund të kundërshtohet nga një i akuzuar brenda shtatë ditësh.
Trupi Gjykues lëshoi gjithashtu urdhra dhe paralajmërime konkrete për të akuzuarit (në veçanti Thaçin dhe Selimin), Administratoren, Kryembrojtësit për të gjithë të akuzuarit në lidhje me detyrimin e tyre lidhur me informacion konfidencial, e të gjitha këto mund t’I gjeni në vendim.
Gjykimi Thaҫi dhe të tjerët: Trupi Gjykues refuzon kërkesën e fundit të viktimave si jo brenda afatit
Më 8 shkurt, Trupi Gjykues II refuzoi raportin e fundit me një kërkesë për statusin e viktimës pjesëmarrëse në çështjen Thaçi dhe të tjerët. Trupi Gjykues refuzoi të shqyrtojë themelësinë e kërkesave sepse afati për dorëzimin e kërkesave të tilla në këtë çështje kaloi më 15 shkurt dhe nuk ishin treguar arsye të vlefshme për t’i njohur ato si të vlefshme sipas rregullës 9 (5)(b). Vendimin e plotë mund ta gjeni këtu.
Konferenca mbi Ecurinë e Çështjes në çështjen Januzi, Bahtjari, Haxhi Shala Mbahet më 13 shkurt
Siç është njoftuar në kalendarin e gjykatës, konferenca mbi ecurinë e çështjes në çështjen e përbashkët kundër Sabit Januzit, Ismet Bahtjarit dhe Haxhi Shalës është planifikuar për të martën, 13 shkurt, në orën 10:00. Më shumë informacion mund të gjeni në urdhrin për caktimin e datës.
Salih Mustafa: vendim për konflikt të mundshëm interesi lidhur me emërimin e Mbrojtësit
Pas pranimit të kërkesës nga Venkateswari Alagendra në lidhje me emërimin e saj të mundshëm si Mbrojtëse e Salih Mustafës, Trupi Gjykues në çështjen Thaçi dhe të tjerët konstatoi sot, më 8 shkurt, se ekziston një konflikt i mundshëm interesi nëse ajo do të përfaqësonte edhe Salih Mustafën, përveç emërimit të saj si Mbrojtëse e Jakup Krasniqit. Megjithatë, Trupi Gjykues theksoi se ky vendim nuk duhet të konsiderohet si qëndrim i tij nëse Alagendra duhet të emërohet si Mbrojtëse e Mustafës apo jo sepse këto çështje vendosen nga Administratorja.
Më shumë detaje mund të gjenden në vendim kurse në vijim janë njoftimet tona të mëparshme për këtë çështje: 25/01/2024, 30/01/2024
Bashkohen çështjet gjyqësore të Januzit dhe Bahtijarit dhe të Haxhi Shalës
Më 8 shkurt 2024, Gjykatësi i Procedurës Paraprake Giju miratoi kërkesën e ZPS-së për bashkimin e çështjes kundër Sabit Januzit dhe Ismet Bahtijarit me atë kundër Haxhi Shalës. Gjykatësi Giju konstatoi se bashkimi i këtyre dy çështjeve i plotëson kërkesat e Rregullës 89(1) të Rregullores, se do t'i shërbente administrimit në mënyrën e duhur të drejtësisë dhe nuk do të ishte paragjykues ose në mospërputhje me të drejtat e të akuzuarit.
Sa i përket aktakuzës së ndryshuar të dorëzuar nga ZPS-ja në janar, gjykatësi Giju konstatoi se ajo ishte jooperacionale dhe urdhëroi ZPS-në që ta dorëzojë sërish atë. Deri atëherë, çështja e përbashkët do të vazhdojë në bazë të aktakuzave të konfirmuara në të dy çështjet.
Çështja e re e përbashkët do të emërtohet Prokurori i Specializuar kundër Sabit Januzit, Ismet Bahtijarit dhe Haxhi Shalës me numër KSC-BC-2023-10. Çështja aktuale me numër KSC-BC-2023-11 (që i referohej vetëm Haxhi Shalës) do të ndërpritet por do të mbetet pjesë e dokumentacionit të çështjes së përbashkët.
Më shumë hollësi në vendimin.