Salih Mustafa ishte komandant i njësitit gueril BIA i cili operonte brenda Zonës Operative të Llapit të Ushtrisë Çlirimtare të Kosovës (‘UÇK’). Gjykimi u zhvillua nga 15 shtatori 2021 deri më 15 shtator 2022. Aktgjykimi u shpall më 16 dhjetor 2022, Mustafa u shpall fajtor për krimet e luftës të ndalimit arbitrar, torturës dhe vrasjes së paligjshme dhe u dënua me 26 vjet burgim. Më 5 prill 2023, Trupi Gjykues urdhëroi Mustafën të paguajë një shumë të gjithsejtë prej 207.000 euro si kompensim për dëmin e shkaktuar ndaj viktimave të krimeve për të cilat është shpallur fajtor. Më 14 dhjetor 2023, Paneli i Gjykatës së Apelit zvogëloi dënimin e tij në 22 vjet burgim. Pas vendimit të Gjykatës Supreme më 29 korrik 2024, çështja iu kthye përsëri Panelit të Apelit për të shqyrtuar uljen e dënimit. Më 10 shtator 2024, Paneli i Gjykatës së Apelit shqiptoi një dënim të ri të njësuar prej 15 vitesh, duke llogaritur dhe kohën në paraburgim. Në këtë çështje gjyqësore ishin 8 viktima pjesëmarrëse.
Çështja përfshin katër ish-zyrtarë të lartë të pretenduar të Ushtrisë Çlirimtare të Kosovës: Hashim Thaçi, Kadri Veseli, Rexhep Selimi dhe Jakup Krasniqi. Sipas aktakuzës, krimet e paraqitura në të u kryen më së paku prej marsit 1998 deri në shtator 1999 në disa vendndodhje në Kosovë, si edhe në Kukës dhe Cahan, në Shqipërinë Veriore. Më 15 dhjetor 2022, Gjykatësi i Procedurës Paraprake ia kaloi dosjen e çështjes Trupit Gjykues II. Gjykimi filloi më 3 prill 2023 me deklaratat hyrëse të Prokurorit të Specializuar dhe të përfaqësuesit të viktimave, ndjekur nga ekipet e mbrojtjes më 4 dhe 5 prill 2023. Në këtë çështje gjyqësore janë 153 viktima pjesëmarrëse.
Pjetër Shala pretendohet se ishte anëtar i Ushtrisë Çlirimtare të Kosovës (‘UÇK’) i stacionuar në Kukës, Shqipëri. Krimet e pretenduara për të cilat akuzohet Shala u kryen përafërsisht midis 17 majit 1999 dhe 5 qershorit 1999, kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej UÇK-së. Më 21 shtator 2022, Gjykatësi i Procedurës Paraprake ia kaloi dosjen e çështjes Trupit Gjykues I. Gjykimi filloi më 21 shkurt 2023 dhe përfundoi më 17 prill 2024. Aktgjykimi u shpall më 16 korrik 2024: Trupi Gjykues e shpalli të akuzuarin fajtor për krimet e luftës të ndalimit arbitrar, torturës dhe vrasjes së paligjshme dhe e dënoi me 18 vjet burgim, duke llogaritur dhe kohën në paraburgim. Më 2 shtator 2024, Mbrojtja e P. Shalës dorëzoi njoftimin për apel kundër aktgjykimit. Shqiptimi i urdhrit për zhdëmtimin e viktimave është planifikuar për datën 29 nëntor 2024. Në këtë çështje gjyqësore janë 8 viktima pjesëmarrëse.
Më 6 tetor 2023, Sabit Januzi dhe Ismet Bahtijari u transferuan në objektin e Paraburgimit të DHSK-së, ndërsa Haxhi Shala u transferua më 12 dhjetor 2023. Të tre personat akuzohen për vepra penale kundër administrimit të drejtësisë. Më 13 dhjetor 2023, ZPS-ja dorëzoi kërkesë për bashkimin e çështjes Januzi dhe Bahtijari (KSC-BC-2023-10) me çështjen Haxhi Shala (KSC-BC-2023-11). Në vijim, më 8 shkurt 2024, Gjykatësi i Procedurës Paraprake miratoi kërkesën e ZPS-së dhe vendosi që çështja e përbashkët do të quhet Prokurori i Specializuar kundër Sabit Januzit, Ismet Bahtijarit dhe Haxhi Shalës dhe do të mbajë numrin e çështjes KSC-BC-2023-10. Më 4 shtator 2024, Gjykatësja e Procedurës Paraprake ia kaloi dosjen e çështjes Trupit Gjykues I. Konferencat përgatitore për gjykimin u mbajtën më 7 dhe 8 tetor 2024. Deklaratat hyrëse fillimisht u caktuan për 14 dhe 15 nëntor 2024, por më 12 nëntor 2024, Trupi Gjykues vendosi që këto seanca të mos mbahen, duke lënë datën e fillimit të gjykimit aktualisht në pritje.
Isni Kilaj u arrestua në Kosovë dhe u transferua në objektin e paraburgimit të DHSK-së më 3 nëntor 2023 për vepra penale të pretenduara kundër administrimit të drejtësisë. Më 15 dhjetor 2023, ZPS-ja dorëzoi aktakuzën fillestare kundër Kilajt për konfirmim, pasuar nga aktakuza e rishikuar më 11 mars 2024. Në vijim, më 2 maj 2024, ZPS-ja kërkoi pezullimin e aktakuzës së rishikuar për të dorëzuar një version tjetër të ndryshuar për konfirmim. Duke marrë parasysh këto zhvillime si dhe prezumimin e pafajësisë dhe të drejtën për liri të Kilajt, ndër faktorët tjerë, Gjykatësi i Vetëm i DHSK-së përcaktoi se zgjatja e paraburgimit të Kilajt do të ishte e paarsyeshme. Rrjedhimisht, më 15 maj 2024, Gjykatësi urdhëroi lirimin e Kilajt në Kosovë me kushte të rrepta. Më 18 korrik 2024, ZPS-ja njoftoi se ka dorëzuar aktakuzën e ndryshuar.
Gucati dhe Haradinaj shërbyen respektivisht si kryetar dhe si nënkryetar të Organizatës së Veteranëve të Luftës të Ushtrisë Çlirimtare të Kosovës dhe çështja e tyre ka të bëjë me vepra penale të pengimit të drejtësisë. Gjykimi u zhvillua nga 7 tetori 2021 deri më 17 mars 2022. Më 18 maj 2022, Trupi Gjykues i shpalli të dy të akuzuarit fajtorë dhe i dënoj me nga katër vjet e gjysmë burgim dhe me gjobë prej 100 eurosh për secilin. Më 2 shkurt 2023, Paneli i Gjykatës së Apelit uli dënimin e tyre në katër vjet e tre muaj burgim dhe la në fuqi dënimin me gjobë prej njëqind eurosh. Pas modifikimit të dënimeve të tyre nga Kryetarja e DHSK-së Trendafilova, Gucati dhe Haradinaj u liruan me kusht përkatësisht më 17 tetor dhe 14 dhjetor 2023.
